ਸਾਜਰੇ ਸਵੇਰੇ ਸਾਡੇ ਦਿਲ ਵਾਲੇ ਵਿਹੜੇ
ਦੇਖੋ ਕੋਈ ਆਇਆ ਏ
ਪਿਆਰ ਦਾ ਪੁਜਾਰੀ ਲੱਗੇ
ਦਿਲਾਂ ਦਾ ਵਪਾਰੀ ਲੱਗੇ
ਸੁੱਤੀਆਂ ਮੁੱਹਬਤਾਂ ਨੂੰ ਆਣਕੇ ਜਗਾਇਆ ਏ
ਉਹਦੇ ਡੂੰਘੇ ਡੂੰਘੇ ਨੈਣ
ਧਾਰੀ ਸੁਰਮਾਂ ਨਾ ਸਹਿਣ
ਯਾਦਾਂ ਨਾਲ ਅੱਖੀਆਂ ਚੋਂ ਪਾਣੀ ਵੱਗ ਆਇਆ ਏ
ਚਿਹਰੇ ਤੇ ਉਦਾਸੀ ਉਹਦੇ
ਜਾਵੇ ਨਾਂ ਛੁਪਾਈ ਉਹ ਤੋਂ
ਲੱਗੇ ਜਿੱਦਾਂ ਸੱਜਣਾਂ ਤੋਂ ਵਿਛੜ ਕੇ ਆਇਆ ਏ
ਜੁਲਫ਼ਾਂ ਘਟਾਵਾਂ ਜਿੱਦਾਂ
ਸਾਉਣ ਦਾ ਮਹੀਨਾ ਹੋਵੇ
ਬਿਜਲੀ ਦੇ ਵਾਂਗੂੰ ਦੇਖੋ ਸਭ ਰੁਸ਼ਨਾਇਆ ਏ
ਛੋਹਿਆਂ ਨਾ ਟੋਇਆ ਨਾ
ਸਾਨੂੰ ਕੁਝ ਹੋਇਆ ਨਾ
ਫਿਰ ਵੀ ਖਿਆਲ ਉਹਦਾ ਦਿਲ ਵਿੱਚ ਆਇਆ ਏ
ਦਿਲ ਚਾਹੇ ਬੰਦ ਰੱਖਾਂ
ਅੱਖੀਆਂ ਨੂੰ ਸਦਾ ਲਈ
ਦੱਸ ਨਹੀਉਂ ਹੁੰਦਾ ਜੋ ਨਜ਼ਾਰਾ ਅਸੀਂ ਪਾਇਆ ਏ
ਹੋਈ ਨਵੀਂ ਹਲਚਲ
ਝੱਟ ਲੰਘੇ ਉਹ ਪੱਲ
ਪਿਆਰ ਨਾਲ ਜਦ ਕਿਸੇ ਗਲ ਨਾਲ ਲਾਇਆ ਏ
ਬੁਲ੍ਹੀਆਂ ਤੇ ਕੰਬਣੀ
ਦਿਲ ਵਿੱਚ ਡਰ ਸੀ
ਕੂਲਾ ਜਿਹਾ ਹੱਥ ਜਦੋਂ ਹੱਥਾਂ ਵਿੱਚ ਆਇਆ ਏ
ਹੋਠਾਂ ਨਾਲ ਹੋਠਾਂ ਨੂੰ ਉਸ ਜਦ ਲਾਇਆ ਏ
ਬੜਾ ਘਸਮਾਨ ਸੀ
ਬੜਾ ਬੇਈਮਾਨ ਸੀ
ਹੋਇਆ ਨਾ ਪਛਾਣ ਉਹ ਦੱਸੋ ਕੌਣ ਆਇਆ ਏ
ਸਾਜਰੇ ਸਵੇਰੇ ਸਾਡੇ ਦਿਲ ਵਾਲੇ ਵਿਹੜੇ
ਦੇਖੋ ਕੋਈ ਆਇਆ ਏ, ਦੇਖੋ ਕੋਈ ਆਇਆ ਏ