ਅਹਿਮਦਾਬਾਦ – ਭਾਰਤ ਨੇ ਕਬੱਡੀ ਵਰਲਡ ਕੱਪ – 2016 ਦੇ ਖਿਤਾਬੀ ਮੁਕਾਬਲੇ ਵਿੱਚ ਈਰਾਨ ਨੂੰ ਹਰਾ ਕੇ ਅਠਵੀਂ ਵਾਰ ਵਿਸ਼ਵ ਕੱਪ ਟਰਾਫੀ ਜਿੱਤ ਲਈ ਹੈ। ਭਾਰਤ ਨੇ 38- 29 ਦੇ ਫਰਕ ਨਾਲ ਈਰਾਨ ਨੂੰ ਹਰਾਇਆ। ਅਜੇ ਠਾਕੁਰ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਟੀਮ ਨੂੰ ਜਿੱਤ ਦਿਵਾਈ।
ਭਾਰਤੀ ਟੀਮ ਖੇਡ ਦੇ ਪਹਿਲੇ ਹਾਫ਼ ਵਿੱਚ ਪਿੱਛੇ ਚੱਲ ਰਹੀ ਸੀ ਪਰ ਦੂਸਰੇ ਹਾਫ਼ ਵਿੱਚ ਖਿਡਾਰੀਆਂ ਨੇ ਗਜ਼ਬ ਦਾ ਉਤਸ਼ਾਹ ਵਿਖਾ ਕੇ ਟੀਮ ਨੂੰ ਜਿੱਤ ਵੱਲ ਮੋੜ ਲਿਆ। ਈਰਾਨੀ ਖਿਡਾਰੀ ਅੰਤਿਮ ਪਲਾਂ ਵਿੱਚ ਕੁਝ ਵੀ ਨਹੀਂ ਕਰ ਸਕੇ ਤੇ ਭਾਰਤੀ ਖਿਡਾਰੀ ਉਨ੍ਹਾਂ ਤੇ ਭਾਰੀ ਰਹੇ। ਟੀਮ ਨੇ ਦਮਦਾਰ ਵਾਪਸੀ ਕਰਦੇ ਹੋਏ ਈਰਾਨ ਨੂੰ ਆਲ ਆਊਟ ਕਰ ਦਿੱਤਾ। ਇਸ ਜਿੱਤ ਦਾ ਸਿਹਰਾ ਰੇਡਰ ਅਜੇ ਠਾਕੁਰ ਦੇ ਸਿਰ ਰਿਹਾ, ਜਿਸ ਨੇ ਪੂਰੇ ਵਰਲਡ ਕੱਪ ਦੌਰਾਨ ਸੱਭ ਤੋਂ ਵੱਧ 12 ਰੇਡ ਪੁਆਂਇੰਟਸ ਹਾਸਿਲ ਕੀਤੇ। ਇਸ ਤੋਂ ਪਹਿਲਾਂ ਵੀ ਭਾਰਤ ਦੋ ਵਾਰ ਈਰਾਨ ਨੂੰ ਫਾਈਨਲ ਵਿੱਚ ਹਰਾ ਚੁੱਕਿਆ ਹੈ।