ਨਵੀਨ ਨਿਸ਼ਚਲ ਨਹੀਂ ਰਹੇ

ਮੁੰਬਈ-ਟੈਲੀਵੀਜ਼ਨ ਅਤੇ ਫਿਲਮਾਂ ਦੇ ਮੰਨੇ ਪ੍ਰਮੰਨੇ ਕਲਾਕਾਰ ਨਵੀਨ ਨਿਸ਼ਚਲ ਸ਼ਨਿੱਚਰਵਾਰ ਨੂੰ ਦਿਲ ਦਾ ਦੌਰਾ ਪੈਣ ਕਰਕੇ ਚਲਾਣਾ ਕਰ ਗਏ। ਉਨ੍ਹਾਂ ਦੀ ਉਮਰ 65 ਸਾਲਾਂ ਦੀ ਸੀ। ਉਨ੍ਹਾਂ ਦੇ ਪ੍ਰਵਾਰ ਅਨੁਸਾਰ ਸਵੇਰੇ ਅੰਦਾਜ਼ਨ 10 ਵਜੇ ਉਹ ਆਪਣੇ ਨਜ਼ਦੀਕੀ ਦੋਸਤ ਰਣਧੀਰ ਕਪੂਰ ਦੇ ਨਾਲ ਪੁਣੇ ਲਈ ਰਵਾਨਾ ਹੋਏ। ਅਜੇ ਉਹ ਮੱਧ ਮੁੰਬਈ ਵਿਚ ਹੀ ਸਨ ਕਿ ਉਨ੍ਹਾਂ ਨੂੰ ਦਿਲ ਦਾ ਦੌਰਾ ਪੈ ਗਿਆ। ਉਨ੍ਹਾਂ ਨੂੰ ਨਜ਼ਦੀਕੀ ਹਸਪਤਾਲ ਲਿਜਾਇਆ ਗਿਆ, ਜਿਥੇ ਉਨ੍ਹਾਂ ਨੂੰ ਮਿਤ੍ਰਕ ਕਰਾਰ ਦਿੱਤਾ ਗਿਆ।
ਨਵੀਨ ਨਿਸ਼ਚਲ ਦਾ ਅੰਤਮ ਸੰਸਕਾਰ ਸ਼ਨਿੱਚਰਵਾਰ ਸ਼ਾਮੀਂ  ਕਰ ਦਿਤਾ ਗਿਆ। ਨਵੀਨ ਨਿਸ਼ਚਲ ਨੇ 1970 ਦੇ ਦਹਾਕੇ ਵਿਚ ਕਈ ਹਿਟ ਫਿਲਮਾਂ ਵਿਚ ਕੰਮ ਕੀਤਾ। ਜਿਨ੍ਹਾਂ ਚੋਂ ਸਾਵਨ ਭਾਦੋਂ,ਧੁੰਦ,  ਵਿਕਟੋਰੀਆ ਨੰਬਰ 203 ਅਤੇ ਬੁੱਢਾ ਮਿਲ ਗਯਾ ਜਿਹੀਆਂ ਫਿਲਮਾਂ ਸ਼ਾਮਲ ਸਨ। ਇਨ੍ਹਾਂ ਤੋਂ ਇਲਾਵਾ ਉਨ੍ਹਾਂ ਨੇ ਕਈ ਪੰਜਾਬੀ ਫਿਲਮਾਂ ਵਿਚ ਵੀ ਕੰਮ ਕੀਤਾ। ਉਨ੍ਹਾਂ ਨੇ ਟੀ ਵੀ ਸੀਰੀਅਲ ਵਿਚ ਵੀ ਅਹਿਮ ਭੂਮਿਕਾਵਾਂ ਨਿਭਾਈਆਂ।