ਇਨਾਮ ਦੇ ਲਾਲਚ ਵਿਚ ਆਪਣੇ ਲੱਖਾਂ ਰੁਪੈ ਗਵਾਏ

ਅੰਮ੍ਰਿਤਸਰ- ਇੰਟਰਨੈਟ ਤੇ ਕੰਮ ਕਰਨ ਦੇ ਫਾਇਦੇ ਵੀ ਬਹੁਤ ਹਨ ਅਤੇ ਕੁਝ ਨੁਕਸਾਨ ਵੀ ਹਨ। ਕੁਝ ਲੋਕ ਇਸਦਾ ਗਲਤ ਇਸਤੇਮਾਲ ਕਰਕੇ ਭੋਲੇ-ਭਾਲੇ ਲੋਕਾਂ ਨਾਲ ਠਗੀਆਂ ਵੀ ਮਾਰਦੇ ਹਨ। ਇਸ ਲਈ ਸਮਝਦਾਰੀ ਤੋਂ ਕੰਮ ਲੈਣਾ ਚਾਹੀਦਾ ਹੈ ਅਤੇ ਬਿਨ੍ਹਾਂ ਸੋਚੇ ਸਮਝੇ ਕਿਸੇ ਨੂੰ ਵੀ ਪੈਸਾ ਨਹੀ ਦੇਣਾ ਚਾਹੀਦਾ। ਅੰਮ੍ਰਿਤਸਰ ਦੇ ਜਹਾਂਗੀਰ ਪਿੰਡ ਦਾ ਵਸਨੀਕ  ਰਾਜਵਿੰਦਰ ਸਿੰਘ ਵੀ ਇੰਟਰਨੈਟ ਤੇ ਠਗੀ ਦਾ ਸਿ਼ਕਾਰ ਹੋਇਆ ਹੈ। ਉਸਨੂੰ ਯੂ ਐਸ ਇੰਟਰਪ੍ਰਾਈਜਜ ਤੋਂ ਇਕ ਈਮੇਲ ਮਿਲੀ, ਜਿਸ ਵਿਚ ਲਿਖਿਆ ਹੋਇਆ ਸੀ ਕਿ ਕੰਪਨੀ ਦੁਆਰਾ ਕਰਵਾਏ ਗਏ ਮੁਕਾਬਲੇ ਵਿਚ ਰਾਜਵਿੰਦਰ ਦਾ ਪੰਜ ਲੱਖ ਡਾਲਰ ਦਾ ਇਨਾਮ ਨਿਕਲਿਆ ਹੈ। ਉਸਨੇ ਕੰਪਨੀ ਦੇ ਅਧਿਕਾਰੀਆਂ ਨਾਲ ਫੋਨ ਤੇ ਗੱਲ ਕੀਤੀ ਤਾਂ ਅਧਿਕਾਰੀਆਂ ਨੇ ਇਸ ਗੱਲ ਦੀ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਇਥੇ ਆਉਣ ਦੀ ਲੋੜ ਨਹੀ। ਉਹ ਉਥੇ ਘਰ ਬੈਠੇ ਹੀ ਇਨਾਮ ਪ੍ਰਾਪਤ ਕਰ ਸਕਦਾ ਹੈ। ਕੰਪਨੀ ਨੇ ਇਹ ਸ਼ਰਤ ਰੱਖੀ ਕਿ ਇਨਾਮ ਨੂੰ ਅੰਮ੍ਰਿਤਸਰ ਭੇਜਣ ਲਈ ਉਹ ਚਾਰ ਲੱਖ ਪੰਜੀ ਹਜਾਰ ਰੁਪੈ ਕੰਪਨੀ ਦੇ ਅਕਾਂਊਟ ਵਿਚ ਜਮ੍ਹਾਂ ਕਰਵਾ ਦੇਵੇ। ਰਸੀਦਾਂ ਵੀ ਉਸਦੇ ਕੋਲ ਹਨ। ਪੈਸੇ ਜਮ੍ਹਾਂ ਕਰਵਾਉਣ ਤੋਂ ਬਾਅਦ ਕੰਪਨੀ ਵਾਲਿਆਂ ਨੇ ਫੋਨ ਰਸੀਵ ਕਰਨਾ ਬੰਦ ਕਰ ਦਿਤਾ। ਪੰਜ ਲੱਖ ਡਾਲਰ ਵੀ ਨਾਂ ਮਿਲੇ ਅਤੇ ਚਾਰ ਲੱਖ ਵੀ ਗਏ। ਉਸਨੂੰ ਅਹਿਸਾਸ ਹੋਇਆ ਕਿ ਉਸ ਨਾਲ ਠਗੀ ਵਜੀ ਹੈ ਤਾਂ ਉਸ ਨੇ ਪੁਲਿਸ ਸਟੇਸ਼ਨ ਵਿਚ ਇਸਦੀ ਸਿ਼ਕਾਇਤ ਕੀਤੀ। ਐਸ ਐਸਪੀ ਨੇ ਕਾਰਵਾਈ ਕਰਨ ਦੇ ਅਦੇਸ਼ ਦੇ ਦਿਤੇ ਹਨ। ਪੁਲਿਸ ਸਟੇਸ਼ਨ ਵਿਚ ਧੋਖੇਬਾਜੀ ਅਤੇ ਇਨਫਰਮੇਸ਼ਨ ਟੈਕਨੌਲੌਜੀ ਐਕਟ ਦੇ ਤਹਿਤ ਕੇਸ ਦਰਜ ਕਰ ਲਿਆ ਗਿਆ ਹੈ। ਐਸਐਚਓ ਦਾ ਕਹਿਣਾ ਹੈ ਕਿ ਜਿਸ ਵਿਅਕਤੀ ਦੇ ਖਾਤੇ ਵਿਚ ਪੈਸੇ ਜਮ੍ਹਾਂ ਕਰਵਾਏ ਗਏ ਹਨ ਉਸਦਾ ਪਤਾ ਲਾ ਲਿਆ ਗਿਆ ਹੈ। ਜਲਦੀ ਹੀ ਉਸਨੂੰ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।